Презентация учурунда Швейцария Конфедерациясынын Кыргызстандагы Чрезвычайный жана Ыйгарым укуктуу элчиси Сироко Мессерли жаңы программанын негизги аспекттери тууралуу кенен маалымат берди. Программа туруктуу экономикалык өнүгүү, мамлекеттик иштерди башкаруу, суу ресурстарын пайдалануу, энергетика жана климаттын өзгөрүүлөрүнө адаптация сыяктуу тармактарда долбоорлорду ишке ашырууну камтыйт.
Мындан тышкары, катышуучулар Кыргызстандын мамлекеттик органдарынын 2030-жылга чейин Улуттук өнүктүрүү программасына ылайык приоритеттүү багыттары боюнча сунуштарын талкуулашты.
Министрдин орун басары Медер Абакиров Швейцариянын Кыргызстан үчүн негизги батыштык өнөктөштөрдүн бири катары маанилүүлүгүн белгиледи. Ал швейцариялык тарапка колдоосу үчүн ыраазычылык билдирди жана ишке ашырылып жаткан долбоорлор өлкөнүн жарандарынын жашоо деңгээлине оң таасир тийгизип, Кыргызстан менен Швейцариянын ортосундагы эки тараптуу байланыштарды бекемдээрин айтты.
Маалымат үчүн: 2013-жылдан бери Кыргызстан менен Швейцариянын кызматташтык механизми иштеп жатат, анын алкагында 2013-2016 жана 2017-2021-жылдарга стратегиялар ишке ашырылган, ошондой эле учурда 2022-2025-жылдарга кызматташтык программасы аяктоого жакын.
