Бул тууралуу Кыргыз Республикасынын Мамлекеттик кадр кызматынын директору А.Карашевдин «Чивнинг» программасынын Секретариатынын өкүлү мырза Хариш Локхун менен 2014-жылдын 19-сентябрында болгон жолугушуусунда сөз болду.
Мырза Хариш Локхун Кыргызстанга жаш жарандарды «Чивнинг» программасына тартуу жолдорун изилдөө үчүн атайын келген.
Анын айтымында, Мамлекеттик кадр кызматы мамлекеттик кызматкерлерди даярдоо боюнча иш алып баргандыктан, пайдалуу өнөктөш болуп саналат.
Ал «Чивнинг» программасы, Улуу Британиянын Тышкы иштер министрлиги тарабынан каржыланган, таланттуу жаштарга анын престиждүү университеттеринде билим алуу үчүн стипендияларды берет деп билдирди.
Бул жылы аталган программа боюнча билим берүү Бангора университети, Дарем университети жана Кембридж университетинде каралган. Билим берүүдө приоритеттүү багыттар катары: мамлекеттик башкаруу, коопсуздук/конфликттерди алдын алуу, демократияны өнүктүрүү/адам укуктары жана регионалдык кызматташтык бекитилген.
«Чивнинг» стипендиясы ай сайын төлөнүүчү стипендияны, эл аралык билет сатып алууну, диссертация же тезис жазуу үчүн грантты, виза чыгымдарын жана билим алуу үчүн төлөмдү камтыйт.
А.Карашев Кыргыз Республикасынын Мамлекеттик кадр кызматы долбоордун секретариатынын сунушун кубаныч менен кабыл алып, Кыргыз Республикасында программаны ишке ашыруу боюнча кызматташууга даяр экенин билдирди.
Ал «Чивнинг» программасы Кыргызстандын мамлекеттик кызматкерлерине Улуу Британиядай өнүккөн өлкөдө билим алууга жана дүйнөлүк стандарттарга жооп берген билим алууга мыкты мүмкүнчүлүк берет деп белгиледи.
Мамлекеттик кадр кызматы «Чивнинг» программасын ишке ашыруу үчүн зарыл болгон иштерди жакынкы күндөрү баштайт.
