Франциянын борборунда Кыргызстандын ЮНЕСКОдагы туруктуу өкүлү Садык Шер-Нияздын жаңы генеральдык директору Халед Аль-Анани менен биринчи жолугушуусу өттү. Сүйлөшүү учурунда тараптар кызматташтыкты бекемдөө жана Кыргызстандын ЮНЕСКОдогу катышуусун арттыруу боюнча ниеттерин растады, деп билдирет Тышкы иштер министрлигинин басма сөз кызматы.
Кыргыз тарап маданий жана тарыхый мурастарды коргоо маселелерине болгон берилгендигин баса белгилеп, өлкө 2025–2029-жылдар аралыгында ЮНЕСКОнун Аткаруу кеңешине шайланганын билдирди. Садык Шер-Нияз Кыргызстан туруктуу өнүгүү боюнча маанилүү жетишкендиктерге жеткенин, бул саясий туруктуулук жана экономикалык өсүш менен камсыздалганын, бул болсо амбициялуу максаттар үчүн мүмкүнчүлүктөрдү ачарын кошумчалады.
Кыргызстан үчүн приоритеттүү багыттар: климаттын өзгөрүшүнө адаптация, суу жана жер экосистемаларын коргоо, кедейчилик менен күрөшүү жана креативдүү индустрияны өнүктүрүү болуп саналат.
ЮНЕСКОнун генеральдык директору Халед Аль-Анани Кыргызстандын уюмдагы активдүү позициясын, айрыкча маданий долбоорлор боюнча, жогору баалады. Ал ошондой эле ЮНЕСКО тарабынан эки ири иш-чарага: VI Дүйнөлүк көчмөндөр оюндарына жана Чыңгыз Айтматовдун атындагы Эл аралык Ысык-Көл форумуна патронат берүү мүмкүнчүлүгүн карап чыгууга даяр экенин билдирди.
Тараптар кызматташтыкты мындан ары өнүктүрүү жана жаңы биргелешкен долбоорлорду ишке ашыруу боюнча ишенимдерин билдиришти.
