Өткөн жылы стадион капиталдык ремонттон өтүп, чыгыш тарабындагы чатыр жаңыртылып, ошондой эле түндүк жана түштүк трибунасы жаңыланды. Мындан тышкары, жеңил атлетика жолуна эл аралык стандарттарга жооп берген резина жабыны төшөлдү. Жумуштарды ОсОО «Универсал» компаниясы аткарды, ал эми заказчысы Ош шаарынын мэриясынын капиталдык курулуш башкармалыгы болду.
Стадиондун курулушуна техникалык көзөмөл жүргүзгөн Эркин Эргешов Turmush сайтына берген интервьюсунда кырдаалды комментарийлеп берди. Анын айтымында, крошуп баштаган бетон элементтери опорлордун негизинде алардын кызмат мөөнөтүн узартуу үчүн куюлган. Бирок ал бул конструкциянын бекемдигине таасир этпей турганын баса белгиледи: «Бетондун бузулушу чатырды кармап турган бир нече опорго гана тиешелүү. Бул опорлордун негизги бөлүгү абдан бекем, жана бетондун мезгил-мезгили менен жаңыртылышы же боёлушу керек болсо да, учурдагы бузулуш конструкциянын туруктуулугуна таасир этпейт. Биз бул жерлерди штукатурка кылып, боёп берүүнү пландап жатабыз», — деди Эргешов.
Мындан тышкары, спорт комитетинин сол жагындагы тосмодо да бузулуштар башталды. Комитеттин кызматкери Фарух Сыдыков тосмонун мурдагы жетекчилик тарабынан жеке аймакта курулушту алдын алуу үчүн орнотулганын түшүндүрдү. «Стадиондун опорлору орнотулганда, жер казуу иштерин жүргүзүп, таштар менен топурак ушул аймакка төгүлгөн, бул бетонду жабыркатууга алып келди. Тосмонун ички жагы жакшы, ал эми сырткы жагы жабыркаган», — деп кошумчалады ал.
Учурда жабыркаган тосмону оңдоо иштери жүргүзүлүүдө.
