АКШнын президенти: "Көп жылдар бою биз Дания жана Европалык Союздун башка өлкөлөрүн бажы салыктарын албастан каржылап келгенбиз. Эми, Дания бизге карызын кайтаруунун убагы келди, анткени дүйнөдө тынчтык үчүн күрөш жүрүп жатат!" - деп жазган ал Truth Social социалдык тармагындагы аккаунтунда.
Ошондой эле Трамп "бажы салыгы Гренландияны сатып алуу боюнча толук жана шартсыз келишимге жеткенге чейин күчүндө болот" деп кошумчалады.
Мындан тышкары, ал "Кытай жана Россия Гренландияны алуу үчүн аракет кылып жатышат" деп кайрадан тынчсыздануусун билдирди, "Дания муну токтото албайт" деп баса белгиледи.
Эскерте кетсек, Трамп мурда Гренландияны контролдоо боюнча пландарына каршы чыккан өлкөлөрдүн товарларына бажы салыктарын киргизүү менен коркутуп келген, "арал биздин улуттук коопсуздугубуз үчүн абдан маанилүү" деп билдирген.
