Бишкекте кызга катуу зат менен кол салган деп шектелген эркек кармалды.
Октябрь районунун Ички иштер башкармалыгы тарабынан берилген маалыматка ылайык, 2025-жылдын 19-ноябрында В.А. аттуу жаран укук коргоо органдарына кайрылган. Ал саат 19:00 чамасында Куттубаев жана Токомбаев көчөлөрүнүн кесилишинде белгисиз адам тарабынан кол салууга дуушар болуп, башына ургандыктан кан агып кеткенин билдирген. Окуя боюнча жабырлануучуга соттук-медициналык экспертиза дайындалган.
Октябрь Ички иштер башкармалыгы тергөө органдары Кыргыз Республикасынын Кылмыш-жаза кодексинин 280-беренеси ("Хулигандык") боюнча кылмыш ишин козгоду. Оперативдүү-издөө иш-чараларынын натыйжасында 1998-жылы туулган К.А. аттуу жаран кармалып, убактылуу кармоо жайына жайгаштырылды. Анын абалы текшерилгенде, ал алкоголдук мас абалда болгон.
Бул иштин тергөөсү уланууда.
