Бүгүн, 24-ноябрда, Кыргыз Республикасынын өкмөтүнүн жыйынында күн тартибине ылайык, экинчи маселе катары «1941-1945-жылдардагы Улуу Ата Мекендик согуштагы Жеңиштин 70-жылдыгын белгилөөгө даярдык боюнча 2014-2015-жылдарга иш-чаралар планынын аткарылышы жөнүндө» жобо каралды.
КРнын Премьер-министри Жоомарт Оторбаев өкмөт тарабынан Жеңиштин 70-жылдыгын белгилөөгө даярдык боюнча планды ишке ашыруу үчүн конкреттүү аракеттер иштелип чыкканын белгиледи. «СНГ мамлекеттеринин башчыларынын Минскте өткөн акыркы саммитинде 2015-жыл Улуу Ата Мекендик согуштун ардагерлеринин жылы деп жарыялоо чечими кабыл алынды. Президент Алмазбек Атамбаев Улуу Ата Мекендик согуштун ардагерлерине Кыргыз Республикасынын Президентине өмүр бою стипендияга кошумча төлөмдү белгилөө жөнүндө Указга кол койду. Кошумча төлөм 3 миң сомду түзөт. Бардык аймактар жана тиешелүү мамлекеттик органдар белгиленген иш-чараларды Жеңиштин 70-жылдыгын белгилөө боюнча убагында жана жоопкерчилик менен аткарышы керек. Биз ардагерлерибиздин баатырдыгын жана эрдигин эч качан унутпайбыз», — деди Дж.Оторбаев.
Андан ары КРнын социалдык өнүктүрүү министри Кудайберген Базарбаев Жеңиштин юбилейлик датасына даярдык жана иштин жыйынтыктары тууралуу доклад жасады.
Министрдин айтымында, учурда Кыргызстанда Улуу Ата Мекендик согуштун 1261 ардагеринин бар экендиги белгилүү. «Ар жылы ардагерлерибиздин саны азайып жатат. Бул жылы гана 283 ардагер дүйнөдөн кетті. Өкмөт социалдык өнүктүрүү министрлиги аркылуу ардагерлерге туруктуу материалдык колдоо көрсөтүп келет. Жеңиштин 70-жылдыгын белгилөө үчүн жыл сайын берилүүчү кошумча бир жолку акча жардамын көбөйтүү сунушталууда», — деди министр. Ал ошондой эле «И.В. Панфилов атындагы 8-мотоаткыч гвардия дивизиясы» китебин кайра чыгаруу пландалып жатканын кошумчалады. Бул китеп 20 жыл мурун чыгарылган.
К.Базарбаев И.Панфиловдун 100 жылдыгына карата Союз баатырына эстелик орнотуу үчүн марафон өткөрүү пландалып жатканын билдирди.
Коргоо министринин орун басары Замир Суеркулов Ала-Тоо аянтында аскердик парад өткөрүү үчүн даярдык иштеринин жүрүп жатканын белгиледи. «Ошондой эле Жеңиштин 70-жылдыгына карата юбилейлик медалдар чыгарылат. Куралдуу күчтөрдүн музейин ачуу пландалууда. Жылдын аягына чейин Москвадагы Кызыл аянттагы аскердик парадга катышуу үчүн ардагерлердин тизмеси даярдалат», — деди орун басар министр.
Каржы министри Ольга Лаврованын айтымында, ар жыл сайын ардагерлерди колдоо үчүн өлкөнүн бюджетинен 1 миллиард сомго чейин каражат бөлүнөт. «Жеңиштин 70-жылдыгын белгилөө үчүн бюджетте белгилүү каражаттар каралган», — деди ал.
Премьер-министр мамлекеттик органдардын жетекчилеринин отчетторун угуп, жергиликтүү жерлердеги Өкмөттүн ыйгарым укуктуу өкүлдөрүнө жана тиешелүү мамлекеттик органдарга Жеңиштин 70-жылдыгын белгилөөгө даярдык жана өткөрүү боюнча иш-чараларды сапаттуу жана убагында аткарууну тапшырды.
Жеңиштин 70-жылдыгын белгилөө учурунда илимий-практикалык конференциялар, көргөзмөлөр жана фестивалдар, согуштун баатырлары менен жолугушуулар, эл аралык спорттук мелдештер жана турнилер өткөрүлөт.
