Ал бардык ресторандар жана кызмат көрсөтүүчү мекемелер өздөрүнүн токтоочу жайларын уюштуруп, тактап алышы керектигин белгиледи. Азыркы учурда шаардагы үч негизги көчөдө кырдаалды жакшыртуу боюнча иштер жүргүзүлүүдө.
«Биз жакында Т. Байзаков проспектинде жана Пушкин, Б. Осмонов көчөлөрүндө иштеп жаткан ишкерлер менен жолугушууларды өткөрдүк. Маселе белгиленди, жана ишкерлерге аны чечүү үчүн убакыт берилди. Дал ушул көчөлөрдө эң көп мыйзам бузуулар байкалууда», — деп кошумчалады Исмаилов.
Тротуарлардын жана жолдордун кеңейишине карабастан, көптөгөн коммерциялык объектилер токтоочу жай үчүн жапсарлаш аймактарды колдонушууда, бул болсо болбойт. «Биз көчөлөрдүн кеңейишин кимдир бирөөгө пайда алуу үчүн эмес, тыгындарды азайтуу үчүн жасап жатабыз», — деп баса белгиледи ал.
Мисалы, Байзаков проспектинде ЖАГУ (Жалал-Абад мамлекеттик университети) жайгашкан. Биз ошондой эле анын жетекчилигине мугалимдердин унааларын университеттин аймагында калтырууну өтүнүп кайрылдык. Белгиленген мөөнөт өткөндөн кийин текшерүүлөр жүргүзүлөт. Эгер талаптар аткарылбаса, мындай мекемелерди жабуу сунушталат, — деди Исмаилов.
Жолугушууга аталган көчөлөрдө жайгашкан 30дан ашык объекттин ээлери катышты. Талкуу учурунда, бир ресторандын жакын жерде токтоочу жайды түзгөнү, ал эми башкасы токтоочу жай уюштуруу үчүн коңшу жерди сатып алгандыгы маалым болду.
Бул көчөлөрдөгү иштер аяктагандан кийин, А. Абдрахманов көчөсүндө көрктөндүрүү улантылат, ошондой эле шаардык аэропортко бараткан жол тазаланып, тартипке келтирилет.
Эскерте кетсек, Ош шаарында 1-ноябрдан тартып, өзүнүн токтоочу жайы жок кафе, ресторандар жана соода борборлорунун убактылуу жабылышы тууралуу чечим күчүнө кирди.
Жергиликтүү администрациянын маалыматына ылайык, бул чара жарандардын жана мекемелердин конокторунун коопсуздугун камсыз кылууга, ошондой эле унаа тыгындарын азайтууга багытталган. Мэрия ар бир коомдук тамактануу мекемеси өзүнүн токтоочу жайына ээ болушу керектигин баса белгилеп, мекемелерге токтоочу жайларды тез арада уюштуруу боюнча көрсөтмө берилгенин маалымдады.
