Акыркы жылдары Кытайда жалгыз энелердин биргелешип жашоосуна жаңы ыкмалар активдүү өнүгүүдө, алар балдарды биргелешип тарбиялоо жана үй-бүлөлүк камкордуктарды бөлүшүү үчүн биригишет. Бул көрүнүш тууралуу The Guardian маалымат берет.
Социалдык тармактар жалгыз энелер үчүн биргелешип жашоону издеп жаткан адамдардын платформасына айланууда. Алардын көпчүлүгү кошуна издеп жаткандыгы тууралуу жарыяларын бөлүшүшөт.
«Мен башка энени табууну каалайм, бирге жашап, бири-бирибизди колдосок. Эгер балдардын курагы бирдей болсо — бул жөн гана керемет, алар достошо алышат. Эгерде сен бала менен жалгыз болсоң, кээде тамакка да убакыт жетпей калат», — деп жазган энелердин бири популярдуу Rednote тиркемесинде.
Расмий маалыматтар жок болсо да, адистер мындай демилгелердин улам көбөйүп жатканын белгилешет — издөө жарыяларынан баштап, биргелешип жашоону уюштуруунун жолдору тууралуу талкууларга чейин.
Кытайда болжол менен 30 миллион жалгыз эне бар. Соңку 20 жылда ажырашуу деңгели төрт эсе өскөн, жана көпчүлүк учурда балдар энелер менен калат. Алимент төлөөгө милдеттендирген мыйзамга карабастан, көптөгөн жалгыз энелер ири шаарларда кедейлик чегинде жашашат.
Мындай жаңы жашоо форматынын үлгүсү болгон энелердин бири Зу Даньюй жана Фэй Юань, алар 2022-жылдан бери Нанкинде биргелешип жашап келишет.
«Биз экөөбүз биргелешип жашоонун максатын түшүнөбүз: жашоо кыйынчылыктарын жеңилдетүү жана жүк бөлүшүү», — деп бөлүшөт Зу Даньюй.
Эки аял да ажырашкан: Зуда эки кызы, ал эми Фэйдин бир кызы бар. Алардын достугу пандемия жана локдаун учурунда бекемделип, акыры биргелешип жашоого чечим кабыл алышкан.
Фэй тартипти жактырат, бирок тамак бышырууну билбейт, ал эми Зу — мыкты ашпозчу. Учурда алар биргелешип бизнес жүргүзүп, үй-бүлө катары жашап, үй жана тарбиялоочу милдеттерди бөлүшүшөт. Алардын балдары сабактарын окуп, дем алыш күндөрүн бирге өткөрүшөт.
Интернеттеги сын-пикирлерге жана мазақтоолорго карабастан, алардын жакындары алардын тандоосун колдошот.
«Биз үчүн эң негизгиси — балдардын бактылуулугу жана ден соолугу, алардын окуудагы жетишкендиктери жана бизнестин гүлдөп-өсүшү», — деп кошумчалайт Зу.
Адистер жалгыз ата-энелер Кытайда өзгөчө финансылык кыйынчылыктарды баштан кечирип жатканын белгилешет, анткени мамлекеттик колдоо дээрлик жок, ал эми туугандар тарабынан берилген жардам көп учурда жетишсиз. Ошондуктан көпчүлүгү социалдык тармактар аркылуу өз ара жардам издеп жатышат.
