Кыргызстанда 2025-жылы мыйзамсыз курулуштар катталган жок, ал эми 2023-жылы мындай объектилердин саны болжол менен 200дү түзгөн. Бул тууралуу КРдин курулуш, архитектура жана турак-жай-коммуналдык чарба министри Нурдан Орунтаев «Элден собол» программасынын түз эфиринде билдирди.
Ал бардык курулуш иштер азыркы учурда күчүндө болгон мыйзамдарга ылайык жүргүзүлүп жатканын белгиледи. Мурда мыйзамсыз курулуштарга байланыштуу бузуулар болгон, бирок бүгүнкү күндө мындай учурлар жок.
«Керектүү уруксаттарсыз жана долбоордук документтерсиз курулуш жүргүзүүгө катуу тыюу салынат. Эгер мыйзамсыз курулуш башталса, дароо чаралар көрүлөт, анын ичинде айып пулдар. 2025-жылы мыйзамсыз курулуштар менен күрөшүү алкагында болжол менен 3 миң административдик протокол түзүлгөн, ал эми салынган айып пулдардын жалпы суммасы 120 миллион сомду түзгөн. Бул суммадан 96 миллион сом (80%) өлкөнүн бюджетине келип түшкөн», — деди министр.
Мындан тышкары, Орунтаев өткөн жылдарда курулган мыйзамсыз объектилерди легалдаштыруу боюнча иштер улантылып жатканын белгиледи. 2023-жылы аныкталган 200 объекттин болжол менен 100ү жарандардын укуктарын коргоо үчүн легалдаштырылган.
