Жарандык авиация тармагындагы кызматташтыкты күчөтүү максатында, Жапониянын эл аралык кызматташтык агенттиги (JICA) жана «Кыргызаэронавигация» мамлекеттик ишканасы жаңы долбоорду баштоону пландаштырууда. Долбоор учактарды башкаруу, ылдамдыкты көзөмөлдөө жана учуу схемаларын иштеп чыгуу боюнча диспетчерлерди даярдоого багытталат.
Долбоорду ишке ашыруу боюнча талкуулардын протоколу 18-декабрда кол коюлду. Иш-чарага Кыргызстандагы JICA өкүлдөрү жана «Кыргызаэронавигация» катышты, бул эки тарап үчүн маанилүү кадам болуп саналат.
Жаңы долбоордун негизги максаты — аба кыймылын башкаруунун оперативдик натыйжалуулугун жогорулатуу жана маршруттарды иштеп чыгуу сапатын жакшыртуу, бул өз кезегинде Кыргызстандагы жарандык авиацияда коопсуздукту жана кызмат көрсөтүүнү жакшыртууга көмөктөшөт.
Протоколго кол койгондор: Кыргызстандагы JICAнын туруктуу өкүлү Нишигата Котаро, «Кыргызаэронавигациянын» башкы директору Торокелди Омуров жана КРнын Жарандык авиация мамлекеттик агенттигинин орун басары Канат Тологонов.
