Мэриянын маалыматына ылайык, 2001-2002-жылдары Максим Горький атындагы № 8 мектептин 1 гектар 33 соток жер участоктон 2 миң 163 квадрат метр жер муниципалдык чечимдердин негизинде жеке менчикке берилген. Натыйжада, билим берүү мекемеси мейманканалар жана ресторандар менен курчалып калды. Учурда бул жер участокторун муниципалдык менчикке кайтаруу маселеси сотто каралууда.
Андан тышкары, Антон Макаренко атындагы № 6 гимназиясында 1 миң 818 квадрат метр жер да жеке адамдарга берилген. Бирок 23-декабрда Жогорку сот бул чечимдерди мыйзамсыз деп таанып, жерлерди кайтаруу мүмкүнчүлүгүн жаратты.
Мындан тышкары, Тажиматов атындагы № 57 мектептин аймагында 15тен ашык ар кандай объектилер курулган. Бул боюнча да текшерүүлөр жана укуктук иш-чаралар жүргүзүлүүдө.
Шаардык мэрия 2026-жылы мектептерге таандык мыйзамсыз ажыратылган жерлерди аныктоо жана кайтаруу боюнча ишмердүүлүктү күчөтүү пландалып жатканын билдирди.
