Мониторинг процессинде айрым компаниялар Кыргыз Республикасынан жарандарды Түркияда жумушка тартуу үчүн жалган маалыматтарды бергендиги белгилүү болду.
Атап айтканда, өлкө сыртында жумушка орношуу үчүн уруксат алуу максатында ыйгарым укуктуу органга берилген документтерде чындыкка дал келбеген маалыматтар болгон, анда Түркиядагы уюмдар (жумуш берүүчүлөр же делдалдар) менен чындыктагы кызматташтык тууралуу маалымат жок болчу.
Аныкталган мыйзам бузуулар натыйжасында төмөнкү агенттиктердин иши убактылуу токтотулду:
- ОсОО «Голден ворк & тревел»;
- ОсОО «Айрис Тревел»;
- ОсОО «Рамай-Саякат»;
- ОсОО «Аска-Трэвел».
Уруксаттарды токтотуу мыйзам бузууларды жараткан бардык себептер жоюлгандан кийин гана улантылат.
Чет өлкөдөгү жарандарды жумушка орноштуруу борбору уруксат алуу учурунда жалган маалымат берүү жана тышкы эмгек миграциясы боюнча мыйзамдарды сактабоо жоопкерчиликке, анын ичинде уруксаттарды убактылуу токтотуу же жокко чыгарууга алып келиши мүмкүн экенин эскертет.
