Кыргыз Республикасынын курулуш, архитектура жана турак-жай-коммуналдык чарба министри Нурдан Орунтаев 17-январда Бишкектеги бир нече курулуш объектилерин текшерди.
Инспекция учурунда Анкара көчөсүндө жайгашкан жана ОсОО «Аалам Строй» компаниясына таандык турак жай комплексинде курулуш мыйзамдарын жана техникалык коопсуздук талаптарын бузуу фактылары аныкталды. Бузуулар бул объекттин ондон ашык блокторун камтыды. Ошондой эле, компания курулуштун айрым этаптарын жүргүзүү үчүн жеке лабораториялардын кызматтарын пайдаланганы белгилүү болду. Мындан тышкары, үлүшчүлөргө блоктордун мыйзамсыз өткөрүлүшү боюнча фактылар катталды.
Текшерүүнүн жыйынтыгында ОсОО «Аалам Строй» компаниясына аныкталган ар бир бузуу үчүн айып пулдар салынды жана тиешелүү протоколдор түзүлдү. Объекттеги курулуш иштерин токтотуу чечими кабыл алынды. Компаниянын лицензиясын убактылуу токтотуу маселеси комиссиянын кийинки жыйынында каралат. Мындан тышкары, министр курулуштун сапатын текшерүү үчүн Республикалык сертификаттоо борборунун адистерин тартууну тапшырды. Лабораториялык изилдөөлөрдүн жыйынтыктарына жараша кошумча чаралар көрүлөт.
Текшерүүнүн жыйынтыгы менен Нурдан Орунтаев, көзөмөлдөгү мекемелердин жооптуу кызматкерлерине катуу дисциплинардык чаралар колдонуларын белгиледи.
