Кыргыз Республикасынын Саламаттык сактоо министрлиги «Жоопкер бол!» аттуу республикалык айлыкты баштаарын жарыялады. Бул демилге 18 жаштан жогорку эркектер арасында инфекциялык эмес оорулардын тобокелдик факторлорун аныктоого багытталган.
Бул кампаниянын алкагында министрлик эркектерди жергиликтүү биринчи медициналык-санитардык жардам мекемелерине, мисалы, үй-бүлөлүк медицина борборлоруна, жалпы дарыгердик практикаларга, үй-бүлөлүк дарыгерлердин топторуна жана фельдшердик-акушердик пункттарга алдын алуу медициналык кеңештер алууга чакырат.
2025-жылы акциянын жүрүшүндө өлкө боюнча 973 миңден ашык эркек инфекциялык эмес оорулардын алдын алуу скринингинен өтүштү.
Министрликтин маалыматына ылайык, 119,6 миң эркекте (бул 12 пайыз) жогорулаган кан басымы аныкталды. Мындан тышкары, 49,6 миң эркек (5 пайыз) жүрөк-кан тамыр ооруларынын жогорку тобокелдик тобунда, ал эми болжол менен 60,8 миң (6 пайыз) диабеттин жогорку тобокелдигине ээ болду.
2025-жылы 15,4 миң адам биринчи жолу артериалдык гипертензия диагнозу менен катталганын, ал эми 7,4 миң адам диабет диагнозу менен катталганын белгилеп өтүү керек. Жүрөк-кан тамыр оорулары Кыргызстандагы чоңдор арасында 16,6 миң адамдын өлүмүнө себеп болду.
Бул демилге 2019-жылы Швейцария тарабынан каржыланган «Кыргызстанда инфекциялык эмес ооруларды эффективдүү башкаруу жана алдын алуу» долбоорунун алкагында биринчи жолу башталган жана ошондон бери жыл сайын КРнын Саламаттык сактоо министрлигинин жетекчилиги астында өткөрүлүп келет.
- Инфекциялык эмес оорулар (ИНО) жүрөк-кан тамыр, онкологиялык, созылмалы респиратордук оорулар жана диабет сыяктуу созулмалы ооруларды камтыйт. Негизги алдын алууга болуучу тобокелдик факторлоруна ден-соолукка зыяндуу тамактануу, тамеки тартуу, ашыкча алкоголь колдонуу жана физикалык активдүүлүктүн жетишсиздиги кирет.
