Депутаттардын өлкөнүн ар кайсы аймактарында гемодиализ борборлорунун жетишсиздиги боюнча суроолоруна жооп берип жатып, министр учурда бул жардамды жеке клиникалар көрсөтүп жатканын белгиледи.
«Жеке мекемелер муктаждардын 90 пайызын камтыйт. Биз аутсорсинг моделинде иштейбиз, ар бир процедурага 6,5 миң сом бөлүнөт. Менимче, гемодиализди мамлекеттик структураларга кайтаруу керек, анткени бейтаптар жеке клиникалардагы кызматтардын сапаты жана жабдуулардын абалы боюнча нааразычылыктарын билдиришет. Ар жылы мамлекет гемодиализге болжол менен 4 миллиард сом коротот», — деди министр.
Ал ошондой эле мамлекет бул функцияны өзүнө алса, азыркы учурда жок болгон аймактарда гемодиализ борборлорун түзүү мүмкүнчүлүгү каралып жатканын кошумчалады.
2017-жылы Саламаттык сактоо министрлиги мамлекеттик ооруканалардагы гемодиализ бөлүмдөрүн кыскартууну баштап, гемодиализ кызматтары жеке медициналык мекемелерде жеткиликтүү болгон мамлекеттик-жеке өнөктөштүк негизинде долбоорду ишке киргизгенин белгилеп өтүү керек.
