14-мартта Ош шаарынын мэри Жанарбек Акаев жана курулуш, архитектура жана ЖКХ министри Нурдан Орунтаев курулуш бизнесинин өкүлдөрү менен жумушчу жолугушуу өткөрүштү.
Муниципалитет тарабынан берилген маалыматка ылайык, министр жолугушууда катышуучуларды курулуш тармагынын иштөө механизмдери жана курулуш иштерин легалдуу жүргүзүүнүн эрежелери менен тааныштырды. Ал Ош шаарында бир катар объектилер зарыл уруксатсыз курулганын белгиледи. Учурда 34 мындай учур катталды.
Нурдан Орунтаев маселени катуу көңүлгө алууну баса белгилеп, курулуш иштеринин сапаты жана мыйзамдуулугу катуу текшерүүгө алынарын, акыркы чечим өлкө президентинин көзөмөлүндө болорун айтты.
Жанарбек Акаев мамлекеттик структуралар тарабынан жүргүзүлгөн текшерүүлөрдүн жыйынтыктары кийинки аракеттерди аныктарын кошумчалады.
Жолугушуу аяктагандан кийин Нурдан Орунтаев жана Жанарбек Акаев иштердин жүрүшүн баалоо үчүн негизги курулуш жайларына барышты:
- Эки деңгээлдүү айланма: Гапар Айтиев жана Кокум-Бий көчөлөрүн байланыштырган көпүрө.
- Кен-Сай массиви: мектеп жана бала бакчанын курулушу башталды.
- ГИКтин турак үйлөрү: Мамлекеттик ипотекалык компания аркылуу ишке ашырылып жаткан долбоорлор.
