2025-жылдын 18-декабрында маданият министринин орун басары Аскаралы Мадаминов Япониянын Тэйкё университетинин археология профессору Кадзуя Ямаути менен Кыргызстанда иштеп жаткан JICA япон уюмунун эксперти Ёдзи Сакакибара менен жолугушуу өткөрдү.
Бул жолугушууда Кыргыз Республикасынын жана Япониянын колдоосу менен Чүй облусундагы Ак-Бешим (Суяб) шаарчасынын аймагында жүргүзүлүп жаткан археологиялык изилдөөлөр талкууланды. Кадзуя Ямаути бул аймакта маанилүү археологиялык ачылыштар жасалууга мүмкүн болгон көптөгөн каралбаган участоктор бар экенин белгиледи. Ёдзи Сакакибара болсо Ак-Бешимдин дүйнөлүк мурас объектиси катары маанилүүлүгүн баса белгилеп, келечекте археологиялык парк түзүү зарылдыгын айтты.
Министрдин орун басары Ак-Бешим кыргыз эли үчүн гана эмес, дүйнө үчүн да маанилүү тарыхый эстелик экенин белгилеп, археология тармагында квалификациялуу адистердин жетишсиздигине көңүл бурду. Тараптар Япониянын тажрыйбасын колдонуп, кадрларды даярдоо боюнча кызматташууга макулдашты. Жапон тарап активдүү кызматташууга даяр экенин билдирди.
