Будапештте, 2025-жылдын 21-ноябрында, Кыргызстан менен Венгриянын ортосундагы соода-экономикалык кызматташтык боюнча өкмөттөр аралык комиссиясынын 4-отуруму өттү. Бул тууралуу Кыргыз Республикасынын Экономика жана коммерция министрлиги маалымдады.
Отурумду Кыргыз Республикасынын Экономика жана коммерция министри Бакыт Сыдыков жана Венгриянын тышкы экономикалык байланыштар жана тышкы иштер министрлигинин эки тараптуу мамилелер боюнча мамлекеттик катчысы Богларка Иллеш жетектеди.
Бул жолугушуу эки өлкөнүн ортосундагы мамилелерди өнүктүрүү жана практикалык өз ара аракеттенүүнү тереңдетүү боюнча кийинки кадамдарды талкуулоо үчүн маанилүү платформа болду. Жолугушуунун катышуучулары соода, инвестициялар, агрардык жана өнөр жай кызматташтык, санариптештирүү, авиация транспорту, энергетика жана гуманитардык алмашуулар сыяктуу кеңири маселелерди карашты.
Жолугушуунун жыйынтыгында Кыргыз Республикасынын Суу чарба, айыл чарба жана кайра иштетүү өнөр жайы министрлиги менен Венгриянын айыл чарба министрлигинин ортосунда ветеринардык контрол жана ветеринария боюнча өз ара түшүнүшүү меморандуму жана отурумдун протоколу кол коюлду. ```
