Депутат Махабат Мавлянова Ноокат районунда электр энергиясынын үзгүлтүктөрү тууралуу суроо көтөрдү. Рысбеков өлкөдө веердик өчүрүүлөрдүн графиктери киргизилбегенин, учурдагы өчүрүүлөрдүн электр энергиясын чектөө менен байланышкан эмес экенин тактады.
Ноябрь айынан бери Токтогул суу сактагычындагы суу деңгээлинин төмөндүгү себептүү электр энергиясын пайдаланууну жөнгө салуу чаралары киргизилген. Эртең менен жана кечинде элге жеткиликтүү кубаттуулук убактылуу 5 киловатттан 3 киловаттка чейин «акылдуу эсептегичтер» аркылуу төмөндөтүлгөн.
6-ноябрдан баштап мамлекеттик мекемелер үчүн да ушундай чаралар күчүнө кирди.
Өкмөттүн маалыматына ылайык, 15-январга карата Токтогул суу сактагычындагы суу деңгээли 9,102 миллиард куб метрди түзүп, өткөн жылдын ушул күнү менен салыштырганда 1,631 миллиард куб метрге төмөндөгөн.
Энергетика министрлиги жана бийлик электр энергиясын убактылуу өчүрүүлөр техникалык же жөнгө салуучу мүнөздө экенин жана веердик өчүрүүлөрдү билдирбестигин баса белгилешет. Ошондуктан, алар калкты жана уюмдарды электр энергиясын рационалдуу жана үнөмдүү пайдаланууга чакырышууда.
