Жогорку Кенештин агрардык саясат, суу ресурстары, экология жана айлана-чөйрөнү коргоо боюнча комитети «Органикалык өндүрүш жөнүндө» мыйзамды ишке ашыруу боюнча прогрессти талкуулаган жыйын өткөрдү.
Өндүрүштү кайра иштетүү жана органикалык айыл чарба департаментинин директору Мухтар Чыналиев бул маселе боюнча маалымат берди. Ал министрлик мыйзамды ишке ашыруу үчүн бир нече мыйзамдык актыларды даярдаганын билдирди. Айрыкча, органикалык продукцияны сертификаттоо боюнча эрежелер жана кепилдик системасы иштелип чыккан. Ошондой эле 2025–2029-жылдарга Кыргыз Республикасында органикалык өндүрүштү өнүктүрүү программасы бекитилген.
Программанын негизги максаты органикалык продукция өндүрүүчүлөр үчүн мамлекеттик колдоо, сертификаттоо системасын ишке ашыруу жана товарлардын эл аралык рыноктордогу атаандаштыкка жөндөмдүүлүгүн жогорулатуу аркылуу оптималдуу юридикалык, экономикалык жана социалдык шарттарды түзүү болуп саналат.
Талкуу учурунда депутаттар мыйзамды ишке ашыруудагы бар болгон көйгөйлөргө көңүл буруп, бир катар жакшыртууларды сунушташты. Мисалы, Махабат Мавлянова органикалык айыл чарбаны өнүктүрүүнүн маанилүүлүгүн белгилеп, атайын департамент түзүүнү жана республиканын ар бир айыл өкмөтүндө агрономдордун болушун камсыздоону сунуштады.
Нилуфар Алимжанова фермерлердин органикалык өндүрүшкө кызыгуусун жогорулатууга багытталган программалар тууралуу кызыкты. Алишер Козуев органикалык продукцияны сертификаттоо механизмдери тууралуу суроо узатты. Азизбек Турсунбаев Чүй жана Жалал-Абад облустарында биофабрикаларды куруу пландары жана алардын мүмкүн болгон өндүрүш кубаттуулугу тууралуу маалымат берди. Умбеталы Кыдыралиев органикалык продукция өндүрүүчүлөрдүн бирдиктүү реестрин түзүүнү талкуулоонун зарылдыгын кошумчалады.
Мындан тышкары, комитет Жогорку Кенештин 2022-жылдын 17-мартында № 137-VII номери менен кабыл алынган «Жашыл Кыргызстан» экологиялык акциясын өткөрүү боюнча токтомунун аткарылышын жана 2026-жылга пландалган иш-чараларга даярдыкты карады.
