Университеттин илимпоздору жаңы археологиялык объектти изилдөөгө жетишкенин билдиришти, ал биздин заманга чейин II–I кылымдарга таандык.
Экспедициянын инициатору жана геоэколог Абдижапар Аккуловдун айтымында, иш жүрүшүндө көп сандагы керамикалык фрагменттер, «жаргылчак» кол менен жасалган майдалоочу унаанын калдыктары жана таш бетине чегилген петроглифтер табылган. Алгачкы изилдөөлөр табылган керамика эрте темир доорго таандык болушу мүмкүн экенин, ал эми петроглифтер түрк доорунан мурдагы убакка (биздин заманга чейин VI кылымга) таандык экенин көрсөтүп турат.
Илимий топ бул табылгаларды байыркы маданиятты жана региондун экономикалык жашоосун изилдөө үчүн маанилүү деп эсептешет. Жакын арада эстелик боюнча паспорттук документтер түзүлөт жана ал Маданият, маалымат жана жаштар саясаты министрлигинин тарыхый жана маданий объекттер реестрине киргизилет деп пландалууда.
Изилдөөчү топтун курамында Абдижапар Аккулов, ОшГУнун Тарых, археология жана этнология кафедрасынын доценттери, тарых илимдеринин кандидаттары Сабыр Арстанов, Салтанат Алишер кызы жана аспирант Куттубек Орунбай уулу иштешти. Ошондой эле, изилдөөлөргө жергиликтүү тургундар жана орман чарбасынын адистери активдүү катышып, иштерди жүргүзүүгө жардам беришти.
Аккулов 2025-жылдын февралында жергиликтүү активисттердин чакыруусу менен Кара-Суй районунда болуп, уникалдуу орман массивдери жана жайыттардын абалы менен таанышканын белгиледи. Бул сапарында ал климаттык өзгөрүүлөргө байланыштуу эксперименттерди өткөрүү боюнча Ош орман чарбасынын жетекчилиги менен сүйлөшүүлөрдү жүргүзгөн. Ошол учурда илимпоз бул аймакта эски жашоолордун калдыктарын жана кызыктуу архитектуралык курулмаларды байкаган.
Адистер бул археологиялык объектти тереңирээк изилдөө байыркы тарыхты түшүнүүбүздү олуттуу байыта аларын баса белгилешет. Шут жайытынын уникалдуу ландшафтын эске алганда, бул аймак экологиялык жана тарыхый туризм үчүн борборго айлануу мүмкүнчүлүгү жогору.
Объекттер
Спутник
⛶
