Жолугушуунун жүрүшүндө Шайназаров жакында боло турган шайлоолорго даярдык көрүү боюнча учурдагы этап тууралуу маалымат бөлүштү, шайлоо системасындагы маанилүү өзгөрүүлөрдү талкуулады жана чет өлкөдөгү шайлоо участкаларынын санынын көбөйгөнүн белгиледи.
Ал Россияда 15 шаарда кошумча шайлоо участкалары ачылганын жана бул Кыргызстандыктарга, Россияда болуп жаткан же убактылуу жашаган жарандарга шайлоо укуктарын пайдаланууга мүмкүнчүлүк берерин баса белгиледи.
Россиянын Мамлекеттик Думасынын СНГ, евразиялык интеграция жана мекендештер менен байланыштар боюнча комитетинин биринчи орун басары Константин Затулин, Россия тарап Кыргызстандагы шайлоо мыйзамдарын реформалоо процессин жана шайлоо процессине жаңы технологияларды киргизүүнү кылдаттык менен байкап жатканын белгиледи.
Ал ошондой эле, ачыктык жана автоматташтыруу жаатында олуттуу прогресстин натыйжасында көп сандагы байкоочулардын зарылдыгы азайып жатканын кошумчалады. Бирок эл аралык байкоо практикасы парламенттер аралык өз ара аракеттенүүнүн маанилүү элементи бойдон калууда.
