Кыргызстанда жеке билим берүү мекемелерин лицензиялоонун толук санариптик системасына өтүү аяктады. Бул тууралуу «Түндүк» акционердик коомунун санариптик билим берүү департаментинин директору Бектурган Бабаев маалымат жыйын учурунда билдирди.
Ал өкмөттүн токтомуна ылайык, лицензия алуу учурунда билим берүү мекемелери актуалдуу жана мыйзамдуу документтерди гана көрсөтүүгө милдеттүү экенин белгиледи.
«Биздин милдетибиз лицензиялоонун бардык процессин санарип форматка өткөрүү болду. Бул ийгиликтүү ишке ашты. Эми жеке мектеп ачууга ниеттенген жарандар электрондук түрдө зарыл документтерди берүү үчүн порталдан пайдалана алышат, ал эми лицензиялоо процесси онлайн өтөт. Бардык документтерди тиркеп коюуга болот», — деп кошумчалады ал.
