Иссык-Куль облусуна болгон жумушчу сапарынын алкагында Кыргыз Республикасынын Министрлер Кабинетинин төрагасы Адылбек Касымалиев бир нече медициналык мекемелерди текшерди.
Анын ичинде, 1968-жылы негизделген, 550 орунга эсептелген Караколдогу бириктирилген облустук оорукананы зыярат кылды. Адылбек Касымалиев реанимация жана хирургия бөлүмдөрүн карап чыгып, медициналык жабдыктар жана бейтаптар үчүн шарттар менен таанышып чыкты.
Мындан тышкары, 2024-жылы башталган 350 орунга ылайыкталган жаңы корпусунун курулушунун жүрүшүн текшерди. Проект сегиз блокту камтыйт жана анын аякташы 2027-жылга пландалган.
Өкмөт башчы бул медициналык мекеменин регион үчүн маанилүүлүгүн белгилеп, курулушту сапаттуу жана убагында аяктоону талап кылды. Ал ошондой эле ооруканада иштеген жаш дарыгерлерге мамлекеттик ипотекалык программа аркылуу турак жай камсыз кылууну жана кызматтык турак жай куруу мүмкүнчүлүгүн карап чыгууну тапшырды.
Бул сапардын алкагында ага Караколдогу эл аралык медициналык кластердин долбоору сунушталды, ал ЖДБ өлкөлөрү жана коңшу мамлекеттер үчүн медицина жана медициналык туризм боюнча жогорку технологиялардын негизги борбору болууга арналган. Бул проект заманбап диагностикалоо жана дарылоо технологияларын киргизүүгө, атайын онкологиялык жана кардиологиялык борборлорду түзүүгө, ошондой эле жогорку квалификациялуу чет элдик адистерди тартууга жана медициналык билим берүү системасын өнүктүрүүгө багытталган. Проекттин наркы 150 миллион долларды түзөт, ал эми орундардын саны 510. Проектти ишке ашыруу болжол менен 750 жаңы жумуш ордун түзөт.
Адылбек Касымалиев ошондой эле 1894-жылы курулган Өзгөчө кооптуу инфекцияларды контролдоо жана алдын алуу борборунун противочумдук бөлүмүнүн абалы менен таанышып чыкты. Лабораториялык шарттар заманбап биологиялык коопсуздук стандарттарына жооп бербейт. Сапардын жыйынтыгы боюнча жаңы имарат куруу жана бөлүмдүн материалдык-техникалык базасын жаңылоо маселесин иштеп чыгуу тапшырмасы берилди.
Ошондой эле сапар учурунда ал 1897-жылы курулган авариялык имаратта жайгашкан Иссык-Куль облустук соттук-медициналык экспертиза бюросун зыярат кылды. Бюродо үч бөлүм иштейт.
Сапардын жыйынтыгы боюнча Адылбек Касымалиев жооптуу мамлекеттик органдарга бюронун инфраструктурасын модернизациялоо маселелерин, анын ичинде жаңы имарат куруу жана керектүү жабдыктарды сатып алуу маселелерин иштеп чыгууга тапшырма берди. ```
