26 жаштагы Эрбол Карагулов жана анын жубайы Алтынай Майрамбекова 2024-жылдын 25-октябрында үч эмдин ата-энеси болушту. Бул окуянын урматына аларга Нарын шаарындагы ипотекалык комплекстердин биринен батир алуу үчүн сертификат тапшырылды.
Эрболдун айтымында, сертификат колдорунда болсо да, турак жайга ээ болуу боюнча расмий чечим азырынча алынган жок.
Үй-бүлө өз кайрылуусунда жеке турак жайдын жоктугу кыздарын тарбиялоодо кыйынчылыктарды жаратып жатканын билдиришти. «Биз үч эм менен жаш үй-бүлө катары башыбызга чатыр керек. Азыр бизде өз турак жай жок, айына 25 миң сомго батир ижарага алууга мажбурбуз. Үч бөбөк менен бир ижарадагы турак жайдан экинчи ижарадагы турак жайга көчүү өтө кыйын. Ошондуктан, урматтуу президент, Нарын шаарында батир алуу боюнча расмий чечим алууга жардам беришиңизди суранабыз», - деп жазылган алардын катында.
Turmush Нарын шаардык мэриясына кошумча маалымат алуу үчүн кайрылды. Муниципалитеттин жообунда, сертификатты алган соң, жарандар расмий арызды Президенттин администрациясына өз алдынча берүү керектиги айтылган.
Turmush буга чейин 4-ноябрда өкмөт башчынын орун басары жана ГНКБнын жетекчиси Камчыбек Ташиев үч эм төрөлгөн үй-бүлөгө барганын билдирген.
Кыздардан турган үч эм 2024-жылдын 25-октябрында Нарын облустук бириктирилген ооруканасынын төрөт үйүндө Эрбол Карагулов жана Алтынай Майрамбекова үй-бүлөсүндө төрөлгөн.
Кыздардын аттары Ажар, Саадат жана Анара деп коюлган.
Камчыбек Ташиев үй-бүлөгө 500 миң сом жана президент Садыр Жапаровдун атынан үч бөлмөлүү батирдин документтерин тапшырды.
Дарыгерлердин маалыматына ылайык, 24 жаштагы Алтынайдын жана анын жаңы төрөлгөн кыздарынын абалы туруктуу деп бааланган.
