Жолугушууда медициналык кызматкерлердин мекенине кайтып келүү маселелери, ошондой эле Кыргызстанда алардын кесиптик ишмердүүлүгү үчүн ыңгайлуу шарттарды түзүү талкууланды.
Досмамбетов саламаттыкты сактоо тармагындагы учурдагы реформалар, анын ичинде медициналык мекемелерди модернизациялоо, айлык акыны жогорулатуу, инфраструктураны жана эмгек шарттарын жакшыртуу пландары тууралуу айтып берди. Ошондой эле социалдык колдоо, карьералык өсүү жана жаштар үчүн кесипте шарттарды түзүү маселелери да көтөрүлдү.
Жолугушуунун учурунда врачтар чет өлкөдөгү иш тажрыйбалары менен бөлүшүп, Кыргызстанда жумушка орношуу жана карьералык мүмкүнчүлүктөр боюнча сунуштарын жана суроолорун билдиришти.
Сүйлөшүүнүн жыйынтыгында, айрым жаш адистер мекенине кайтып, Кыргызстандагы саламаттыкты сактоо системасында карьерасын улантуу мүмкүнчүлүгүн карап чыгууга кызыкдар экендиктерин билдиришти.
Министр өлкөнүн саламаттыкты сактоо системасы квалификациялуу адистерди тартууга кызыкдар экенин жана алардын кесиптик ишмердүүлүгү үчүн зарыл шарттарды түзүүгө жана тиешелүү колдоо көрсөтүүгө даяр экенин белгиледи.
