Иш-чара министрдин орун басарлары Бакытбек Кадыралиев жана Темирбек Эркиновдун жетекчилигинде өттү. Жыйынынын негизги максаты тажрыйба алмашуу жана эл аралык медициналык практикаларды талкуулоо, ошондой эле чет өлкөдөгү врачтардын Кыргызстандагы саламаттык сактоо системасын өнүктүрүүгө катышуу мүмкүнчүлүгү болду.
Жыйындын катышуучулары дүйнөдөгү алдыңкы медициналык мекемелердеги иш тажрыйбасы менен бөлүшүп, Кыргызстандагы саламаттык сактоону жакшыртуу боюнча идеяларды сунушташты. Айрыкча, бронхоскопия жана NGS-диагностика сыяктуу заманбап технологияларды киргизүү, ошондой эле санариптик чечимдерди өнүктүрүү жана онкологиялык, пульмонологиялык, трансплантологиялык жана анестезиологиялык жардамды жакшыртуу маселелери талкууланды. Ошондой эле гемодиализ, мобилдик клиникалар, лицензиялоону жөнөкөйлөтүү жана врачтардын квалификациясын жогорулатуу маселелери көтөрүлдү.
Кадрдык ресурстарга байланыштуу көптөгөн сунуштар айтылды. Адистер кыргыз врачтарын окутууга жардам берүүгө, стажировкаларды уюштурууга, лекциялар өткөрүүгө жана эксперттик чыгыштарды жүргүзүүгө, ошондой эле операцияларды жана мастер-класстарды өткөрүү үчүн профессорлорду тартууга даяр экендиктерин билдиришти. Специалисттердин Кыргызстанга кайтып келишин жана кесиптик долбоорлорго катышуусун камсыздоо маселеси да актуалдуу болду.
Министрдин орун басарлары чет өлкөдө иштеген врачтардын катышуусу саламаттык сактоо тармагын өнүктүрүү үчүн маанилүү ресурс экенин белгилешти. Талкууланган демилгелердин арасында кыргыз врачтарынын жогорку концентрациясы бар өлкөлөрдө оффлайн жана онлайн форматында туруктуу жыйындарды өткөрүү, Миррахимовдук окууларга катышуу мүмкүнчүлүгү жана санариптик жана кадрдык реформаларга тартуу маселелери болду.
Акырында Бакытбек Кадыралиев Саламаттык сактоо министри Каныбек Досмамбет уулу атынан катышуучуларга ыраазычылык билдирди, чет өлкөдөгү мекендештер менен кесиптик байланыштарды колдоонун маанилүүлүгүн белгиледи.
«Биздин өлкө үчүн негизги чакырыктардан бири медицинада кадрдык жетишсиздик болуп калууда. Биз кызматташууга ачыкпыз жана биздин пациенттердин кызыкчылыгы үчүн тажрыйба, билим жана технологияларды тартууга жардам бере турган практикалык чечимдерди издейбиз», - деп белгиледи ал.
