Трамп бул тууралуу өзүнүн Truth Social социалдык тармагындагы баракчасында билдирди. Ал биринчи президенттик мөөнөтүндө АКШнын куралдуу күчтөрүн толугу менен жаңылап, жаңы жана модернизацияланган ядролук системаларды киргизгенин белгиледи.
«Мен Пакистан жана Индия, Иран жана Израиль, ошондой эле Россия жана Украина сыяктуу региондордо ядролук конфликттерди алдын алууга жетиштим. СНВ-3 келишимин (бул келишим АКШ үчүн пайдалуу эмес жана башка жагынан олуттуу бузулууда) узартуунун ордуна, биздин ядролук адистерибизге узак мөөнөттүү негизде иштей турган жаңы, натыйжалуу жана заманбап келишимди иштеп чыгууга ишенишибиз керек», – деди Дональд Трамп.
СНВ келишими 2010-жылдын 8-апрелинде кол коюлуп, 2011-жылдын 5-февралында күчүнө кирген; 2021-жылдын февралында беш жылга узартылган. Жакында Россия Федерациясынын Тышкы иштер министрлиги келишимдин мөөнөтү аяктаганын тастыктады.
БУУнун Башкы катчысы Антониу Гутерриш бул мезгилди «эл аралык коопсуздук үчүн оор убакыт» деп атап, тараптарды ядролук куралдарды көзөмөлдөө үчүн жаңы механизм түзүү боюнча сүйлөшүүлөрдү дароо баштоого чакырды.
