Парламенттин маалымат кызматынын маалыматы боюнча, Жогорку Кенеш менен Азербайжандын Милли Меджлиси ортосундагы өз ара аракеттенүүнү активдештирүүгө, анын ичинде профилдик комитеттердин жана достук топтордун ишине өзгөчө көңүл бурулду.
Марлен Маматалиев Кыргызстан үчүн Азербайжан менен мамилелерди тереңдетүү тышкы саясаттын приоритеттүү багыты экенин белгиледи. Ал мамлекет башчыларынын ортосундагы жакшы мамилелер саясий диалогду жана ар кандай тармактарда кызматташтыкты өнүктүрүүгө жардам берерин айтты.
Торага ошондой эле эки өлкө ортосундагы стратегиялык өнөктөштүктү бекемдөө үчүн парламенттик дипломатиянын маанилүүлүгүн белгилеп, Жогорку Кенештин Милли Меджлиспен активдүү кызматташууга даяр экенин билдирди.
Ал ошондой эле Азербайжано-Кыргыз өнүктүрүү фонду аркылуу ишке ашырылып жаткан биргелешкен долбоорлор жөнүндө айтып, фонддун уставдык капиталы 100 миллион долларга чейин көбөйтүлгөнүн белгиледи. Бул каражаттар пайызсыз ири долбоорлорду ишке ашырууга жумшалат.
Мындан тышкары, соода-экономикалык жана маданий-гуманитардык тармактарда кызматташуу перспективалары, ошондой эле эки өлкөнүн парламенттеринин эл аралык уюмдардагы өз ара аракеттенүүсү талкууланды.
