Ал соттун чечими процессуалдык жана материалдык укуктун аспектилерин шек жаратат деп белгиледи.
«Граждандык процессуалдык мыйзамдар жеке адамдардын ишмердүүлүгүн экстремисттик деп таанууга жол бербейт. Сот фактически жарандардын аракеттерин кылмыш-жаза жагынан баалады, бул граждандык соттун юрисдикциясынан чыгып кетет», — деп кошумчалады юрист.
Алагушев ошондой эле соттук актта кандай материалдардын экстремисттик деп таанылганы жана кандай критерийлер боюнча аныкталганы боюнча конкреттүү көрсөтмөлөр жок экенин баса белгиледи. Бул укуктук тактык жана адилеттүү териштирүү принциптерин бузат.
Темага байланыштуу окуңуз CPJ Temirov Live, Kloop экстремисттик деп таануу чечимин жокко чыгарууга чакырат
«Мындай мамиле абсурддуу кесепеттерге алып келиши мүмкүн: мисалы, расмий адамдар менен болгон интервьюлар, мамлекеттик иш-чаралардан репортаждар, ошондой эле медицина же билим берүү боюнча материалдар да бул категорияга кириши мүмкүн. Мындай мамиле сөз эркиндигин чектөө коркунучун жаратууда, бул Кыргызстандын Конституциясына жана эл аралык милдеттенмелерине, анын ичинде Жарандык жана саясий укуктар боюнча эл аралык пакттын (ЖСУП) 19-беренесине каршы келет. Аныкталган процессуалдык бузуулардын негизинде, кассациялык тартипте чечимди жокко чыгарууга негиздер бар», — деп жыйынтыктады Акмат Алагушев.
Эскертебиз, 27-октябрда Бишкектин Октябрь райондук соту прокуратуранын доо арызын канааттандырып, интернет басылмалары Temirov Live, Kloop Media жана «Айт Айт десе» экстремисттик материалдар деп тааныды.
