Кыргыз Республикасынын Ички иштер министрлиги "Коопсуздук ордери" аттуу жаңы автоматташтырылган маалыматтык системаны сунуштады. Бул система убактылуу коопсуздук ордерлерин жана үй-бүлөлүк зомбулукка байланыштуу тобокелдиктерди баалоо протоколдорун электрондук эсепке алууга, ошондой эле бул ордерлердин шарттарын аткарууну санариптик көзөмөлдөөгө арналган.
Ведомстводон билдиришкендей, бул долбоор ИИМдин үй-бүлөлүк зомбулуктан жарандарды коргоо боюнча ишин модернизациялоого жана санариптештирүүгө багытталган.
Бул иш-чаранын алкагында министрликте Башкы маалымат технологиялары башкармалыгы, ИИМдин Коомдук коопсуздук кызматы, Бишкек шаардык ГУВДсынын өкүлдөрү, ошондой эле Кыргыз Республикасынын Башкы прокуратурасынын алдында иштеген "Укук" мамлекеттик мекемесинин кызматкерлери жана "Кыргыз Республикасында кылмыш адилеттигинде маалыматты интеграцияланган башкарууну илгерилетүү" долбоорунун эксперти катышкан жумушчу жыйын өттү.
Жыйында системаны киргизүүнүн акыркы этаптары талкууланып, Бишкек шаарынын Первомай районунун РУВДсынын инфраструктурасынын жана персоналынын даярдыгы бааланды, ал жаңы системаны тестирлөө үчүн пилоттук бөлүм катары тандалган.
«Коопсуздук ордери» системасын ишке киргизүү мамлекеттик санариптик трансформация программасынын алкагында маанилүү кадам болуп саналат.
