24-декабрда Токтоболот Абдумомунов атындагы Кыргыз улуттук драма театрында министрликтердин жана мамлекеттик мекемелердин башчылары менен курултай делегаттарын кабыл алуу өткөрүлдү. Делегаттар Министрлер кабинетинин мүчөлөрүнө суроолорду берүү жана ар кандай социалдык-экономикалык маселелер боюнча түшүндүрмөлөрдү алуу үчүн уникалдуу мүмкүнчүлүк алышты.
Кабыл алууда төмөнкү министрлер катышты:
Энергетика министрлиги
Энергетика министри Таалайбек Ибраев, анын биринчи орун басары, «Кыргызстандын Улуттук электр тармагы» ААКнын башкы директору жана «Газпром Кыргызстан» ЖЧКнын орун басары делегаттар менен жолугушту.
Талкуу учурунда катышуучулардан эски электр өткөргүчтөрдү алмаштыруу, подстанциялардын кубаттуулугун жогорулатуу жана аймактарды газдаштыруу сыяктуу маселелер боюнча 78 кайрылуу алынды. Ошондой эле, чакан гидроэлектр станцияларын куруу жана күн панелдерин орнотуу боюнча суроолор келип түштү.
Көтөрүлгөн маселелердин кээ бирлери дароо чечилди, ал эми татаал кайрылуулар жооптуу жетекчилерге арыз берүү үчүн өткөрүлдү.
