Кыргыз Республикасынын Эмгек, социалдык камсыздоо жана миграция министрлиги 2025-жылдын үчүнчү кварталында 800дөн ашык бала үй-бүлө тапканын билдирди. Алардын ичинен 492 бала опекага берилсе, 370 бала улуттук деңгээлде асырап алынган, 2 бала чет өлкөлүк жарандарга берилген.
Ведомство белгилегендей, бала кабыл алган ар бир үй-бүлө милдеттүү каттоодон өтүп, опека органдарынын туруктуу көзөмөлүндө болот. Бул балдардын туура каралышын, тарбияланышын жана укуктарын коргоону камсыз кылат.
Ушул эле учурда, балдарды асырап алуу жана опекага берүү процессинин Кыргыз Республикасынын мыйзамдары жана балдарды өлкөнүн жарандарына жана чет өлкөлүк жарандарга берүү боюнча атайын жоболор менен жөнгө салынарын эске салуу керек.
Бул демилгелер ата-энесиз калган балдар үчүн коопсуз жана колдоо көрсөткөн чөйрөнү түзүүгө, ошондой эле Кыргызстандагы үй-бүлөлүк жайгаштыруу институттарын бекемдөөгө багытталган.
