Ведомствонун басма сөз кызматынан алынган маалыматка ылайык, иш-чарага маданият министринин орун басары Асель Раимкулова, Кыргызстандагы Бириккен Улуттар Уюмунун туруктуу координатору Антье Граве, өлкөдөгү ПРООНдун туруктуу өкүлү Александра Соловьева, ФАО өкүлү Олег Гучгельдыев, «БҮУ-аялдар» өкүлү Сайед Садик жана Дүйнөлүк азык-түлүк программасынын өлкөлүк директору Кожиро Накай катышты.
Жыйындын катышуучулары 2025-жылга карата өлкөнүн климаттык туруктуулугун жакшыртууга, табигый ресурстарды башкарууну оптималдаштырууга жана табигый кырсыктарга алдын ала эскертүү жана жооп берүү системаларын күчөтүүгө багытталган биргелешкен иштин жетишкендиктерин талкуулашты. Мындан тышкары, 2026-2027-жылдарга карата негизги стратегикалык приоритеттер аныкталды.
Талкуунун жүрүшүндө 2025-жылы Кыргызстандын климаттын өзгөрүшүнүн кесепеттерине адаптациялык потенциалын жогорулатуу, тобокелдиктерди башкаруу механизмдерин иштеп чыгуу жана мамлекеттик органдар, эл аралык уюмдар жана жеке сектордун катышуусунда сектор аралык өнөктөштүктү кеңейтүү боюнча жүргүзүлгөн маанилүү иштер белгиленди.
Ошондой эле климаттык жана экологиялык приоритеттерди 2030-жылга чейин Кыргызстанды өнүктүрүү боюнча Улуттук программа менен макулдашуу зарылдыгына көңүл бурулду, бул конкреттүү жана өлчөнүүчү натыйжаларга жетүүгө, калктын жашоо деңгээлин жогорулатууга жана өлкөнүн региондорунун туруктуу өнүгүүсүнө көмөктөшөт.
