IV Элдик курултайдын алдында, Токтоболот Абдумомунов атындагы Кыргыз улуттук академиялык драма театрында өткөн курултайдын делегаттары экономика жана соода министрлигинин жетекчилиги жана ага караштуу уюмдардын өкүлдөрү менен жолугушту. Бул тууралуу министрликтин маалымат кызматы билдирди.
Жолугушууда экономикасынын ар кандай секторлоруна байланыштуу маанилүү маселелер талкууланды. Катышкандар кичи жана орто бизнеске колдоо көрсөтүү, өлкөнүн туристтик потенциалын өнүктүрүү, ошондой эле мамлекеттик чек араларды кесип өтүү жана отандык продукцияны сатуу маселелерин көтөрүштү.
Мисалы, Ысык-Көл облусунун Тон районунан келген делегат Эрмек Шамырканов туристтик этногородок куруу боюнча демилге сунуштады, курулуш материалдарына муктаждыкты белгиледи. Ал жергиликтүү тургундардын объектилерди өз алдынча курууга жана туристтик бизнесин өнүктүрүүгө даяр экенин, бирок керектүү материалдарды сатып алууга жардамга муктаж экенин айтты.
Ошондой эле Баткен облусунун Кадамжай районунан келген делегат жаңы ишкерлер үчүн преференцияларды киргизүүнү сунуштады. Ал эми Ноокат районунан келген өкүл кол өнөрчүлөрдү колдоо жана сатуу ишмердүүлүгүндө жардам берүү, ошондой эле жүндү кайра иштетүү боюнча ишкананы ачуу идеясы менен чыкты.
Экономика жана соода министрлиги бардык жазуу жүзүндөгү кайрылууларды кабыл алып, жолугушууга катышуучуларга ар биринин кылдат каралаарын убадалаган. Делегаттар өз суроолоруна расмий жоопторду алышат жана көтөрүлгөн маселелердин эч бири көңүлдөн сырт калбайт.
