Билим берүү кызматкерлеринин жаш муунду окутуу жана тарбиялоодогу маанилүү ролун таанып, салттын улантылышын камсыздоо максатында, Кыргыз Республикасынын Өкмөтү 5-октябрды Кыргыз Республикасындагы билим берүү кызматкерлеринин күнү катары жыл сайын белгиленет деп бекитти.
Тийиштүү токтомду Кыргыз Республикасынын Премьер-министри Джоомарт Оторбаев кол койду. Ошондой эле, 2008-жылдын 5-февралындагы №36 «Кыргыз Республикасындагы билим берүү кызматкерлеринин профессионалдык майрамынын белгилениши жөнүндө» Өкмөттүн токтому жокко чыгарылды.
Мугалимдер күнү жана билим берүү тармагындагы профессионалдар мурда жыл сайын октябрь айынын биринчи жекшембисинде белгиленип, ар кандай даталарга туш келгенин белгилеп өтүү керек.
Ошол эле учурда, 5-октябрь күнү 100дөн ашык өлкөдө мугалимдер күнү катары белгиленет, ал 1994-жылы Дүйнөлүк мугалимдер күнү катары негизделген. Бул бардык мугалимдердин, окутуучулардын жана билим берүү тармагындагы кызматкерлердин профессионалдык майрамы, анда мугалимдердин сапаттуу билим берүү процессиндеги ролу жана жетишкендиктери, ошондой эле коомду өнүктүрүүгө кошкон баа жеткис салымы белгиленет.
Мугалимдер күнүнүн негизделишинин тарыхый негиздемеси 1966-жылдын 5-октябрында Парижде өткөн мугалимдердин статусу боюнча атайын өкмөттөр аралык конференция болуп саналат.
Маалыматтык камсыздоо бөлүмү
Кыргыз Республикасынын Өкмөт аппараты
Кыргыз Республикасынын Өкмөт аппараты
