Кыргыз Республикасынын Борбордук шайлоо комиссиясы чет өлкөдөгү шайлоо участкаларынын даректери менен картаны сунуштады. Борбордук шайлоо комиссиясынын маалыматына ылайык, бул чечим өлкө сыртында турган жарандардын шайлоо укуктарын колдоо максатында кабыл алынган. Натыйжада чет өлкөдө добуш берүү үчүн 71 шайлоо участогу түзүлгөн.
Бул карта жакынкы шайлоо участктарын оңой табууга жана алардын жайгашкан жери тууралуу актуалдуу маалымат алууга мүмкүнчүлүк берет.
Шайлоо участктары ачылган өлкөлөрдүн арасында:
* Россия – 22 участок,
* Түркия – 8,
* Казахстан – 2,
* АКШ – 6,
* Корея Республикасы – 3,
* Италия – 2,
* Германия – 2,
* Кытай (КЭР) – 2,
* Бириккен Араб Эмираттары (БАЭ) – 2.
Ошондой эле төмөнкү мамлекеттерде бирден участок ачылган: Сауд Аравиясы, Австрия, Чехия, Словакия, Өзбекстан, Улуу Британия, Беларусь, Венгрия, Бельгия, Франция, Кувейт, Япония, Катар, Азербайжан, Тажикстан, Түркмөнстан, Швейцария, Малайзия, Пакистан, Индия, Иран, Монголия.
Шайлоо участктарынын өлкөлөрүнүн, шаарларынын жана даректеринин толук тизмесин шилтеме аркылуу табууга болот — картадан өлкөнү тандап, участоктун так жайгашкан жерин билүүгө болот.
