Жолугушууда салык мыйзамдарына болгон өзгөртүүлөр, ошондой эле салыктарды башкаруунун процессин цифрлаштыруу жана ишкерлик үчүн шарттарды жакшыртуу маселелери кенен талкууланды.
Алмамбет Шыкмамат уулу салык системасына киргизилген бардык өзгөртүүлөр бизнес жүргүзүүнү жеңилдетүүгө, ачыктыкты камсыз кылууга жана ыңгайлуу шарттарды түзүүгө, ошондой эле адал салык төлөчүлөр үчүн административдик жүктөмдү азайтууга багытталганын белгиледи.
«Бардык кабыл алынган өзгөртүүлөрдүн максаты — бизнес жүргүзүүнү жеңилдетүү жана ишкерлерди колдоо. Мамлекеттик салык кызматы өз ара аракеттенүүгө ачык жана бизнес менен биргеликте пайда болгон маселелерди чечүүгө даяр», — деп кошумчалады ал.
Салык мыйзамдарындагы негизги өзгөртүүлөр, электрондук транзакцияларды киргизүү жана салык процедураларын цифрлаштыруу боюнча маалымат менен Мамлекеттик салык кызматынан орун басары Кубанычбек Ысабеков чыкты.
Ал кабыл алынган чаралар эсептөөлөрдүн ачыктыгын арттырууга жана салык процессин оптималдаштырууга, өзгөчө кичи жана орто бизнес үчүн, салык салуу тармагында цифрлык инфраструктураны өнүктүрүү максатында багытталганын баса белгиледи.
Жолугушуунун форматы ишкерлерге суроолорду берүү, идеяларды сунуштоо жана салык саясатын жакшыртуу үчүн демилгелер менен бөлүшүү мүмкүнчүлүгүн берди.
Иш-чарага ар кандай ассоциациялардын өкүлдөрү, анын ичинде жабдуучулар, базарлар, кызмат көрсөтүүлөр, салык консультанттары, агроөнөр жай комплекси, тигүүчүлөр, зергерлер, ошондой эле банктар, байланыш операторлору жана өнөр жай ишканалары катышты.
Мамлекеттик салык кызматы мындай жолугушууларды туруктуу өткөрүүнү пландаштырууда, бул мамлекеттик органдар менен бизнес коомчулугунун ортосунда ишенимди бекемдеп, натыйжалуу өнөктөштүктү түзүүгө мүмкүндүк берет.
