Адылбек Касымалиев акыркы жылдары өлкөнүн коргонуу жөндөмдүүлүгү кыйла жогорулаганын белгиледи. 2018 жана 2019-жылдар менен салыштырганда, Кыргыз Республикасынын Куралдуу Күчтөрүнүн бюджети 300% дан ашык өстү. Бул каражаттар материалдык-техникалык базаны модернизациялоого, армияны заманбап курал-жарактар жана техника менен камсыздоого, ошондой эле аскер бөлүктөрүнүн жана гарнизондордун инфраструктурасын өнүктүрүүгө жумшалууда. Заманбап курал-жарак, аскердик жана атайын техника, анын ичинде абадан коргонуу системалары жана радиоэлектрондук күрөш системалары сатып алынды.
Министрлер кабинетинин башчысы Коргоо министрлигиндеги санариптештирүү боюнча иштер тууралуу да маалымат берди. Документ жүгүртүүнүн, жарандык персоналды эсепке алуунун жана аскердик эсепке алуунун процесстери оптималдаштырылды. Учурда аскердик эсепке алуу боюнча электрондук система беш аскер комиссариатында пилоттук режимде иштеп жатат, ал эми март айынын аягына чейин дагы 25 комиссариатта киргизилет.
Министрлер кабинетинин төрагасы ошондой эле аскер кызматкерлерине социалдык колдоо чараларын белгиледи. Атап айтканда, Бишкекте турак жайды ижарага алуу үчүн күндөлүк компенсация 500 сомго, региондордо 420 сомго чейин өстү. Бишкекте аскер кызматкерлерине ипотекалык турак жай үчүн айына 18 миң сом компенсация каралган, региондордо 15 миң сом. 20 жылдан ашык кызмат өтөгөндөргө мамлекет ипотеканы төлөөгө компенсация берет. Мындан тышкары, аскер кызматкерлери тандаган региондо ипотекалык турак жай сатып ала алышат. Жакынкы убакта Мамлекеттик ипотекалык компания аркылуу Коргоо министрлигинин аскер кызматкерлерине курулуштун акыркы стадиясындагы үйлөрдө 900дөн ашык батир берилет.
