Облус милициясынын пресс-кызматы билдиргендей, бул иш-чара президент Садыр Жапаровдун жарандардын кайрылуусуна сапаттуу жана ыкчам жооп берүү боюнча көрсөтмөлөрүнө жооп катары уюштурулган. Ошондой эле жолугушуу ички иштер министри, милициянын генерал-майору Улан Ниязбековдун демилгеси менен өткөрүлгөн. Иш-чарага УВДнын начальниги Жолболду Кочконов, Ат-Башы районунун акими Мухтар Шербаев жана прокурор Кубанычбек Нуруллаев катышты.
Жолболду Кочконов Ат-Башы РОВДсынын имаратында жүргүзүлүп жаткан иштер, анын ичинде капиталдык ремонт жана кызматкерлер үчүн жаңы спорт залынын курулушу тууралуу маалымат берди. Ал ошондой эле айылдык аймактарда жайгашкан милициянын аймактык бөлүмдөрү азыркы учурда керектүү жабдуулар жана жаңы унаалар менен иштеп жатканын белгиледи. Бул чаралар калкты тейлөөнү жакшыртууга жана иштин натыйжалуулугун жогорулатууга багытталган.
Жолугушууда жарандар бир нече маанилүү маселелерди көтөрүштү:
- жолдордогу коопсуздук — Бишкек — Нарын — Торугарт трассасында жаныбарлар менен байланышкан ЖПТнын көбөйүшү;
- техникалык көзөмөл — оң рулдуу унаалар үчүн техникалык көзөмөлдөн өтүүнүн зарылдыгы;
- транспорттук кырдаал — борбордук базарда тыгындар жана айылдардан келген унаалар үчүн токтоочу жайлардын жетишсиздиги;
- ЖППны сактоо — жол кыймылынын эрежелери, аралыкты сактоо жана ички көчөлөрдө токтоочу жай эрежелерин түшүндүрүү иштерин күчөтүүнүн зарылдыгы;
- балдардын коопсуздугу — мектеп окуучуларынын коопсуздугун камсыздоо, тартип бузгандар үчүн атайын мектеп ачуу жана жаштардын бош убактыларын өткөрүү үчүн спорт залдары жана кружоктор түзүү;
- үй-бүлөдөгү зомбулукка каршы күрөш — үй-бүлөдө зомбулук көрсөтүп жаткан адамдарга карата чараларды күчөтүүнүн зарылдыгы.
