Бишкекте билим берүү мекемелериндеги зомбулук жана балдарды коргоо маселелерине арналган улуттук изилдөөнүн жыйынтыктары сунушталды.
Кыргыз Республикасынын Билим берүү министрлиги «Граждандык катышуу» коомдук фонду менен биргеликте жана «Good Neighbors International» филиалынын колдоосу менен жүргүзүлгөн изилдөө өлкөнүн жети облусун, ошондой эле Бишкек жана Ош шаарларындагы билим берүү мекемелерин камтыды. Изилдөөгө 50 мектептен 1045 адам, анын ичинде окуучулар, ата-энелер, мугалимдер жана административдик кызматкерлер катышты.
Изилдөөнүн негизги максаты билим берүү чөйрөсүндөгү зомбулуктун себептерин аныктоо, анын алдын алуу боюнча натыйжалуу чараларды иштеп чыгуу жана билим берүү системасында тарбиялык саясатты жакшыртуу болуп саналат.
Билим берүү министри Догдуркуль Кендирбаева министрлик мектептердеги зомбулук маселесинен кабардар экенин белгиледи.
«Бул көрүнүш менен күрөшүү максатында ар бир мектепте жашы жете элек адамдардын иштерине инспекторлор үчүн кабинеттер түзүлдү жана электрондук күндөлүктөрдө «тревожные кнопки» киргизилди. Бул анонимдүүлүктү жана жеке маалыматтарды коргоону камсыз кылган атайын сервер», - деди ал.
Министр ошондой эле 80% мектептерде видеокөзөмөл камералары орнотулганын, алар Ички иштер министрлигинин Ситуациялык борборуна туташтырылганын белгиледи. ```
