Министрликтин маалыматына ылайык, жумуш издегендер бош орундар, талаптар жана эмгек акы деңгээли тууралуу маалыматты аталган портал аркылуу ала алышат, ошондой эле түздөн-түз жумуш берүүчүлөргө кайрылышы мүмкүн.
Мындан тышкары, жарандар бош орундар жана жумуш менен камсыздоо боюнча чаралар тууралуу 1221 номери аркылуу маалымат ала алышат. Чет өлкөгө миграция боюнча кеңештер 1899 номери аркылуу жеткиликтүү.
Элдик курултайда Россиядан келген делегат Кубанычбек Осмонбетов мигранттардын мекенине кайтып келүүдө зарыл шарттардын жоктугунан кыйынчылыктарга туш болуп жаткандыгын билдирди.
Ал: «Кыргызстандын өнүгүп жаткандыгы угулуп жатат, мигранттарды кайтып келип, бул жерде иштөөгө чакырышууда. Бирок кайтып келүүнү каалагандар үчүн шарттар жок. Мен Эмгек министрлигинин алдында кыска номер түзүүнү сунуштайм, ошондо өлкөнүн бардык айылдары жана райондорунан бош орундар тууралуу маалыматты бир борбордо топтосо, мекендештерибиз телефон чалып, жумуш орундарын билип, иштегени келе алышат», - деп белгиледи.
