"Бул кырдаалдан ким пайда көрүп жатат? Миллиарддаган салык түшпөй жатат. Эксплуатацияга киргизилгенден кийин компаниялар салык милдеттенмелерин аткарууга тийиш, бирок бул болбой жатат, суроолор созулуп жатат. Министрликтин кызматкерлери курулуш компанияларынын кызыкчылыгында иштеп жаткандай, объектилерди эксплуатацияга өткөрүүгө жардам бербей жатышат. Себеби эмнеде?" - деди Туманбаев.
Курулуш министри Нурдан Орунтаев депутаттын айыптоолору чындыкка дал келбестигин билдирди.
"Биринчи кезекте, эч ким мындай кырдаалга кызыкдар эмес. Мисалы, 2022-жылга чейин өлкөдө расмий эксплуатацияга берилбеген 200дөн ашык объект болгон. Азыркы учурда бул маселени чечүү үчүн атайын комиссия түзүлгөн. Өткөн жылы 150 объект ийгиликтүү эксплуатацияга берилди, алардын документтеринде көйгөйлөр болсо да, кээ бир компаниянын ээлери жашырып жүрүштү. Азыркы учурда 50дөй объект калды, алардын үстүндө иш уланууда", - деп белгиледи министр.
Ошондой эле, өкмөт башчысынын биринчи орун басары Данияр Амангельдиев акыркы убакта эксплуатацияга берилген объектилердин саны кыйла көбөйгөнүн кошумчалады. Анын айтымында, 2025-жылы 2024-жылга салыштырмалуу 57% көп объектилер эксплуатацияга берилген.
