2030-жылга чейин өкмөт бул көрсөткүчтү 25 пайызга чейин жогорулатуу пландап жатат
«Агродиалог» форумунда өкмөт башчы Адылбек Касымалиев 2025-жылы айыл чарба продукциясынын өндүрүшү 459,7 млрд сомго жетерин, бул 2024-жылга салыштырганда 62,9 млрд сомго көп экенин билдирди.
Ал ошондой эле кайра иштетүү өнөр жайында өндүрүлгөн продукциянын көлөмү 104,7 млрд сомду түзгөнүн, бул 2024-жылдагы көрсөткүчтөн 16,2 млрд сомго ашык экенин белгиледи.
Өкмөт 2030-жылга чейин айыл чарба продукциясын кайра иштетүүнүн деңгээлин 25 пайызга, 2040-жылга чейин 50 пайызга жеткирүүнү максат кылууда. Азыркы учурда бул көрсөткүч болгону 7 пайызды түзөт.
«2030-жылга чейин коюлган максаттарга жетүү үчүн 385 жаңы кайра иштетүү ишканасын ишке киргизүү зарыл, алардын 75и 2026-жылы иштей башташы керек, ошондой эле агрокластерлерди жана кошумча нарк чынжырларын өнүктүрүү керек», - деп баса белгиледи ал.
Адылбек Касымалиев ошондой эле айыл чарба продукциясынын экспорту боюнча жетишкендиктери менен бөлүштү: 60тан ашык товар түрлөрү 80ден ашык өлкөгө жеткирилүүдө.
Өкмөт башчынын пикири боюнча, 2030-жылга чейин айыл чарбасын өнүктүрүү боюнча Улуттук программада бир нече негизги багыттар белгиленген, алардын ичинде:
- айыл чарба продукциясынын өндүрүшүн 30 пайызга жогорулатуу;
- айыл чарба продукциясын кайра иштетүүнүн физикалык көлөмүн эки эсе көбөйтүү;
- суу жоготууларын 15 пайызга чейин азайтуу;
- сугат жерлеринин аянтын 15 миң гектарга кеңейтүү;
- жерлердин суу менен камсыз болушун 93 миң гектарга жогорулатуу.
«Суу ресурстарынын маанилүүлүгүн эске алып, 2026-жылы ирригация тармагына 12,3 млрд сом бөлүү каралган. Жалпысынан айыл чарбага 41,1 млрд сом бөлүү пландаштырылууда, бул 2025-жылы бөлүнгөн 31,5 млрд сомдон 9,6 млрд сомго көп», - деп кошумчалады ал.
Мындан тышкары, өкмөт башчы агрардык сектордо жана экономикада илим менен билимдин ролун жогорулатуу зарылдыгына көңүл бурду.
Ал Кыргыз улуттук агрардык университетинин жана бул тармакта иштеген илимпоздордун маанилүү салымын күтөөрүн билдирди.
сүрөт www
