2025-жылы жарандардын кайрылууларын жана сот отурумдарын байкоо натыйжасында, Акыйкатчы Институту сот системасында көптөгөн системалык кемчиликтерди аныктады.
Институттун маалыматына ылайык, сот процесстеринин башталышындагы жыш кечигүүлөр жана алардын башка күндөргө которулушу эң маанилүү көйгөйлөрдүн бири болуп калууда. Бул, өз кезегинде, териштирүүлөрдү узартат жана жарандардын адилеттикке жетүүсүн кыйындатат.
2025-жылы Акыйкатчы Институтуна сот процесстери менен байланышкан 816 кайрылуу жана арыз келип түшкөн. Көпчүлүк арыз ээлери чыгарылган сот чечимдерине нааразычылык билдиришти. Атап айтканда, 57 арыз соттун компетенциясына тиешелүү маселелерди, 56 - алименттерди камтыды. Ошондой эле 35 кайрылуу судьялардын аракеттери же аракетсиздиги боюнча, 19 - сот чечимдеринин аткарылбашы боюнча, ошондой эле сот аткаруучуларынын иши боюнча болду.
Мындан тышкары, жыл ичинде сот процесстерин мониторингдөө боюнча 572 суроо-талап берилди, алардын 57,8% кылмыш иштерине, 32,9% жарандык иштерге, жана 9,6% административдик иштерге тиешелүү.
Мониторингдердин көпчүлүгү, тактап айтканда, 61,3% биринчи инстанциядагы соттордо жүргүзүлгөн. Анализ көрсөткөндөй, ар бир экинчи сот отуруму кечигүү менен башталды, жана 270 процесс ичинен 112 (41,5%) кийинкиге калтырылган.
Кечигүүлөрдүн негизги себептери судьялардын жумуш менен жүктөлүшү, бош сот залдарынын жоктугу жана процесс катышуучуларынын келбей калуусу болуп саналат.
Анализдин жыйынтыгы боюнча, Акыйкатчынын өкүлү Джамиля Джаманбаева Жогорку сотко сунуштар жөнөттү. Атап айтканда, отурумдардын графиктерине ылайык контролду күчөтүү, иштердин убагында кароосун камсыздоо, которулуунун себептерин эске алуу жана алардын жоюлушу боюнча чараларды кабыл алуу сунушталды. Ошондой эле, сот залдарын аудио- жана видеотасма системалары менен жабдууну сунушташты.
