Расмий билдирүүсүндө уюм бул чечим журналистке үй-бүлөсүнө кайтып, эки жылдан ашык камакта болгон соң, курагына жетпеген уулу менен кайрадан жолугушууга мүмкүнчүлүк берет деп белгиледи.
Анткен менен, Civil Rights Defenders анын үстүнөн кылмыш ишин толук токтотуунун зарылдыгын кайрадан баса белгилешти. Алар Тажибек кызы камакка алынгандан бери анын мыйзамдуу журналисттик ишмердүүлүгүнө байланыштуу коюлган негизсиз айыптарды жокко чыгаруу үчүн кыргыз бийлигин чакырышканын эске салды.
"Махабат Тажибек кызы толук акталууга жана реабилитацияланууга тийиш", - деп айтылат билдирүүдө.
Ошондой эле, Жогорку Соттун чечиминен кийин ишти уланткан судья Темирбек Маматов ишти токтотуудан жана журналистти актоодон баш тартканын белгилешти. Мындан тышкары, ага өлкөдөн чыгып кетүүгө тыюу салынган жана иш кайра каралууну күтүп жатат.
Махабат Тажибек кызы, Temirov Live жана "Айт айт десе" коррупцияга каршы иликтөө долбоорлорун жетектеп келген, 2024-жылдын январь айында башка учурдагы жана мурдагы редакция кызматкерлер менен бирге кармалган. Ошол эле жылдын октябрь айында ага массалык башаламандыкка чакыруулар боюнча алты жылга эркинен ажыратуу өкүмү чыгарылган.
Civil Rights Defenders билдиргендей, бул иш боюнча калган айыпталуучулар же кечирим берилген, же акталган, же пробация боюнча бошотулган.
