Баткенде 110/35/10 киловольт напряжениеси бар «Суу-Башы» жаңы жогорку вольттуу подстанциясы пайдаланууга берилди, бул тууралуу Энергетика министрлигинин басма сөз кызматы билдирди.
Объекттин ачылышында энергетика министри Таалайбек Ибраев, өсүп жаткан керектөөчүлөрдүн санын канааттандыруу үчүн энергетикалык системанын кубаттуулугун тез арада көбөйтүү зарылдыгын белгиледи.
«2025-жылы биз бир катар подстанцияларды куруу, ири ГЭСтердеги гидроагрегаттарды реконструкциялоо жана кичи ГЭСтер менен күн энергиясы станцияларын пайдаланууга берүү иштерин аткардык. Жаңы турак жай комплекстеринин жана өнөр жай объекттеринин курулушун эске алганда, электр энергиясын өндүрүүнү көбөйтүү өтө маанилүү болуп жатат. Ар бир жаңы подстанция калкты электр энергиясы жана жылуулук менен камсыздоо үчүн чечүүчү мааниге ээ», - деди ал.
«Суу-Башы» подстанциясы 500 чарчы метр аянтты ээлейт жана анын ишке ашырылышы «НЭСК» акционердик коомунун жана Баткен мэриясынын кызматташтыгынын натыйжасында мүмкүн болду. Жобонун жалпы наркы 55 миллион 758 миң сомду түздү:
- анын ичинен муниципалитет жабдууларды сатып алууга 35 миллион 800 миң сом бөлдү;
- Баткен электр тармактары 19 миллион 958 миң сом материалдарды сатып алууга жумшады;
- курулуш иштерин ишкананын өз күчү менен аткарылды.
Бул подстанция 2 224 турак үйдү, Жаны-Достук айылын, өнөр жай зонасын, «Баткен Сити» турак жай массивин, 10 миң орундуу жаңы стадионду, «Чет-Булак» кварталын, Бужум айылын жана курулуп жаткан орус мектебин электр энергиясы менен камсыздайт.
Мындан тышкары, «Суу-Башы» подстанциясы төрт башка подстанцияларга: «Кара-Булак», «Кара-Токой-1», «Кара-Токой-2» жана «Ширеч» электр энергиясын камсыздайт.
Объект 110 киловольт «Айгуль-Таш — Борбордук» жаңы электр өткөргүч линиясына туташтырылган.
Бул иш-чаранын алкагында Баткен электр тармактары авариялык кырдаалдарга тез арада жооп берүү үчүн жаңы атайын техниканы алды: үч JAC N 8 унаасы, бир JAC N56 жана SHANMON экскаватору.
Бул жума башында 35/10 киловольт «Т.Кулатов» подстанциясы жана Ноокат районунда электр өткөргүч линиясы пайдаланууга берилди, ал эми Узген районунда үч жаңы энергетикалык объект бир эле учурда ишке киргизилди.
