Бүгүн Кыргыз Республикасынын Суу ресурстары, айыл чарба жана кайра иштетүү өнөр жайы министрлиги тарабынан өткөрүлгөн жыйында бакчачылык, өсүмдүк өстүрүү жана кооперацияны өнүктүрүү боюнча стратегиялык пландар бекитилди. Бул тууралуу Өсүмдүк өстүрүү, бакчачылык жана кооперация башкармалыгынын жетекчиси Турат Идирисов билдирди.
Турат Идирисовдун белгилөөсү боюнча, бакчачылыкта фермерлерге жемиш өсүмдүктөрүнүн сапаттуу жана сертификатталган көчөттөрүн берүү негизги көңүл бурулат.
Уруктануу тармагында 2028-жылга чейин сертификатталган дан уруктарынын өндүрүшүн 37,1 миң тоннага чейин көбөйтүү пландалууда, бул учурдагы көрсөткүчтөрдөн 30% жогору. Илимий изилдөөлөр үчүн эки мамлекеттик питомник түзүлөт.
Джалал-Абад жана Балыкчыдагы өсүмдүктөрдү коргоо лабораториялары толугу менен жаңыланат жана 2026-жылы иштей баштайт. Ошондой эле 2027-жылы Борбордук токсикология лабораториясын ишке киргизүү пландалууда.
Кооперацияны өнүктүрүү алкагында кооперативдерди техникалар менен камсыз кылуу улантылууда. 2026-2027-жылдары 2000 гектардан ашык жер иштетилет деп күтүлүүдө, бул 120дөн ашык жаңы жумуш ордун түзөт.
«Акылдуу жылытуу жайлары, тамчы суу берүү жана азыктандыруу системалары, робототехника, вертикалдуу фермерлер, ошондой эле дрондор жана спутниктерди колдонуу менен мониторинг жүргүзүү сыяктуу технологиялык инновацияларды киргизүү 25-35% түшүмдүүлүктү жогорулатууга жана суу менен жер семирткичтерди эффективдүү пайдаланууга мүмкүндүк берет», - деп айтылат билдирүүдө.
Ошондой эле жогорку түшүмдүү жана кургакчылыкка чыдамдуу сортторду, анын ичинде дүйнөлүк гибриддерди "DroughtGard" колдонуу продукциянын туруктуулугун жогорулатат деп белгиленди.
Аделя Клычева
