Кыргызстанда BRICS Pay төлөм шлюзун киргизүү мүмкүнчүлүгү каралууда. Бул тууралуу өлкөнүн президентинин алдындагы Улуттук инвестиция агенттигинин пресс-релизинен маалым болду.
Маалыматта агенттикте эл аралык долбоордун өкүлдөрү менен жолугушуу өткөнү, анда трансшекаралык розничдик (C2B) жана корпоративдик (B2B) төлөмдөрдүн өнүгүү перспективалары талкууланганы айтылат.
BRICS Pay төлөм шлюзу БРИКС+ өлкөлөрү арасында финансылык эсептешүүлөрдү жеңилдетүү үчүн арналган борборлоштурулбаган санариптик платформа болуп саналат. Ал төлөмдөрдү улуттук валюталарда тез, коопсуз жана делдалдарсыз жүргүзүүнү камсыз кылып, эл аралык финансылык инфраструктура үчүн заманбап шарттарды түзөт.
Жолугушуу учурунда долбоордун технологиялык архитектурасы жана бизнес модели, ошондой эле Кыргызстанда анын ишке ашырылышына инвестиция тартуу мүмкүнчүлүктөрү талкууланды. Улуттук инвестиция агенттигинин орун басары Мээримбек Койчуманов бул демилгени колдоого даяр экенин билдирип, анын өлкөнүн инвестициялык тартуучулугун жогорулатуу үчүн маанилүүлүгүн баса белгиледи.
Эксперттердин пикири боюнча, BRICS Pay төлөм шлюзунун ишке кириши Кыргызстанды эл аралык төлөм системаларынан көз каранды болуудан азайтып, улуттук финансылык инфраструктура менен интеграцияны күчөтүп, санариптик кызматтардын тезирээк өнүгүшүнө көмөктөшөт.
